Enavos 
Construir senza obstachels
Construir senza obstachels vul dir: resguardar ils basegns d'umans cun in impediment gia durant la planisaziun.
Nagin na duai esser exclus: ni persunas en sutga cun rodas u impedidas da chaminar ni persunas impedidas da vesida u d'udida ni persunas tschorvas u surdas. Era senioras e seniors, famiglias cun charrotschas d'uffants e viagiaturs cun bagascha profiteschan. Construir senza obstachels è in agid per tuts e vegn dabun a l'entira societad. Pir cura ch'ils stabiliments publics, ils meds da traffic, ils implants dal temp liber, ils restaurants etc. èn accessibels libramain, è l'inclusiun pussaivla. E betg il davos dovri era spazi d'abitar senza obstachels per pudair manar ina vita autonoma.
Cussegliaziun per spezialists
Nus cussegliain architectas ed architects, planisaders, autoritads e patruns da construcziun. Saja quai en connex cun la planisaziun d'edifizis novs u cun la transfurmaziun da chasas veglias, saja quai en connex cun abitaziuns privatas, plazs da lavur u spazi public: il post da cussegliaziun per la construcziun senza obstachels cusseglia a moda cumpetenta.
Examinaziuns da dumondas da construcziun
Nus examinain dumondas da construcziun chantunalas e giuditgain, sche las pretensiuns da la construcziun senza obstachels èn ademplidas. Per mauns da las vischnancas elavurain nus posiziuns davart projects da construcziun che na correspundan betg a las basas legalas en il sectur da construcziun.
Traffic public
Nus cussegliain en tut ils secturs dal traffic public che vegnan reglads en il dretg da construcziun chantunal e communal, per exempel en connex cun fermadas dal bus ed implants exteriurs da las staziuns. Per tut ils secturs dal traffic reglads tras leschas federalas è cumpetent il post spezialisà per la tecnica dal traffic public (anteriur uffizi per persunas cun impediments ed il traffic public). Quel cusseglia las interpresas da transport e la collectivitad en la realisaziun d'in traffic public senza obstachels.
Restar en l'atgna abitaziun
Duvrais Vus ina rampa per la sutga cun rodas a l'entrada da Vossa chasa? Sto Voss bogn vegnir adattà als basegns da persunas cun impediments? Alura chattais Vus en il post da cussegliaziun per la construcziun senza obstachels ils dretgs partenaris da discussiun. Noss spezialists As preschentan soluziuns pratitgablas per adattaziuns en Voss'abitaziun u en Voss plaz da lavur.
Activamain per ina midada dal punct da vista
Cun lavur publica, referats e curs da perfecziunament gidain nus a far enconuschenta la construcziun senza obstachels e rendain pli e pli evidenta.
Normas e disposiziuns
L'accessibladad d'edifizis, d'implants exteriurs e da fermadas dal traffic public è reglada en leschas ed ordinaziuns. Ultra da las prescripziuns federalas existan era leschas chantunalas.
- prescripziuns da construcziun chantunalas
- norma da la SIA 500 (construcziuns senza obstachels): ella vala per la projectaziun e l'execuziun en la construcziun auta. En la gronda part da las prescripziuns da construcziun chantunalas vegn renvià a questa norma.
- norma da la VSS SN 640 075 (spazi da traffic senza obstachels): ella vala per la construcziun bassa e determinescha co ch'ils implants exteriurs èn da concepir per umans cun impediments.
- lescha davart l'egualitad da persunas cun impediments
- ordinaziun davart l'egualitad da persunas cun impediments
Tut las basas legalas: www.hindernisfreie-architektur.ch
Rait svizra per la construcziun senza obstachels
Pro Infirmis furma ensemen cun Architectura senza obstachels - Il center spezialià svizzer, Il center spezialisà svizzer e la Procap la „Rait per la construcziun senza obstachels“. Las trais organisaziuns tetgalas s'engaschan sin plaun naziunal per in ambient senza obstachels e coordineschan la lavur dals posts spezialisads per la construcziun senza obstachels activs sin nivel chantunal. Pro Infirmis è commembra dal label LEA .
stampar la pagina